25 տարի, քառորդ դար, 777 համար «9-րդ հրաշալիք» շաբաթաթերթ:
Սերմացուի նման ծնեց բազմաթիվ գրքեր, կյանքի կոչեց ու իրականացրեց բազմաթիվ գաղափարներ, հասկացություններ, նորաբանություններ: Ծնեց ռադիոհեռուստատեսային հաղորդաշարեր, զանազան մրցույթների հիմք դրեց, ստեղծեց բառախաղային մի անկրկնելի միջավայր՝ լեզվատրամաբանական հետաքրքրաշարժ առաջադրանքներ, նկարելուկներ, տառաթվային ծածկագրեր և այլն, շրջանառեց աննախադեպ խաղ-մրցույթներ, ծանր օրերին հույսով ու սիրով լցրեց մարդկանց սրտերը: Այդ գաղափարների մեծ մասը կյանք մտավ բազմաթիվ գրքերի, դասագրքերի, ուսումնական ձեռնարկների, զննական պիտույքների, ուսումնական պաստառների, ուսումնական խաղալիքների, ուսուցման էլեկտրոնային միջոցների տեսքով:
«9-րդ հրաշալիքը» հարուստ անցյալ ունի, քիչ ներկա և արդեն անորոշ ապագա: Ինչ որ արեց՝ ապագայինն էլ է, իհարկե: Այդ առումով ոչ մի կասկած:
Այս ամենն իրականացվեց «9-րդ հրաշալիքի» փոքրիկ, բայց բանիմաց ու նվիրյալ աշխատակազմի միջոցով, որի կորիզն են կազմել Հայկ Սարգսյանը, Հրանտ Վարդանյանը, Արտաշես Թադևոսյանը, Արա Դիլանյանը, Նարինե Գևորգյանը, Ռաֆիկ Ասլանյանը, Հեղինե Ասլանյանը, Լիանա Ավագյանը, Անահիտ Խաչատրյանը և մնացյալ անդամները: Սակայն այսօր «Հրաշալիքը» միայնակ է բառի բուն և փոխաբերական առումով:
Այսօր «Հրաշալիքի» հետ են նրա անդավաճան ընթերցողները. բոլորին մեկիկ-մեկիկ շնորհակալություն, բոլորին մեր սերն ու հարգանքը:
Հետադարձ, թռուցիկ հայացք ձգելով «9-րդ հրաշալիք» թերթի անցած ճանապարհին` համոզվում ես, որ լավ գործը չի կորչում, մտնում է մարդկանց սրտերը և սեր բաժանում:
Комментариев нет:
Отправить комментарий